الویداع سئوگیلیم، الویداع گولوم،
چالیش اونوداسان اولوب- کئچه نی.
چولقاییر باغریمی بو گئجه اؤلوم،
بیر تهر کئچیرسم بو نحس گئجه نی،
بیر شئعیر یازاجام اونودام سنی.
******
بو سئوگی قانیمی ایچیر کؤنلومدن،
بو قوش قانادلانیب، کؤچور کؤنلومدن،
،"دلی بیر آغلاماق کئچیر کؤنلومدن"
بیر آن گؤز یاشلاری بوراخسا منی،
بیر شئعیر یازاجام اونودام سنی.
******
سئوگینین دادیسان، سؤزون دوزوسان،
گؤرونور کیمینسه بخت اولدوزوسان،
من آران اوغلویام، سن داغ قیزیسان،
گز، دولان داغلاری، دوزو، چمنی،
بیر شئعیر یازاجام اونودام سنی.
******
خوش بیر گون گؤرمه دیم من بو حیاتدا،
دائم یول ایتیردیم بو ظلماتدا،
بیر آخشام چاغیندا، گون باتاباتدا،
داغیدیب باشیمدان دومانی، چنی،
بیر شئعیر یازاجام اونودام سنی.
******
او غملی کؤکسوندن قوپوب گئدیرم،
بیر حزین ماهنی یا هوپوب گئدیرم،
سویوق اللریندن اؤپوب گئدیرم،
باغیشلا سئوگیلیم، عفو ائله منی،
بو شئعری یازیرام اونودام سنی.
خوجالینی گؤروب دینمز
کور اولوب گؤزو دونیانین
سؤز منه قالسا دئیردیم
ظالیمدیر اؤزودونیانین
***
قورتارمادیق اداسیندان
آه- ناله صداسیندان
ائرمنی قان- قاداسیندان
قارادیر اوزو دونیانین
***
قاتیللر سرافراز گزر
گونده مین بیر اویون بزر
ییخیلانی ووروب- ازر
آیاغی هوزو دونیانین
بو گئجه من اؤله جم، قالمیاجام صاباحا.
بئله هیجران گئجه سی گؤرمیه جم بیر داها.
سنی بو گوندن بری تاپشیریرام آللاها،
گون گله جک غرورون گؤزلریندن آخاجاق،
منه بو ائتدیکلرین سنه چوخا باخاجاق.
***
صاباحا دک جوجرر مزاریمین باش داشی،
قال یاشا سن دونیادا ایبلیسلرله یاناشی.
نانجیبین اؤنونده تؤکدوغون او گؤز یاشی،
منی مزاریمدا دا یاندیراجاق-یاخاجاق،
منه بو ائتدیکلرین سنه چوخا باخاجاق.
***
بو گئجه من اؤلورم الیم قالیر یاخاندا،
دیکسینمه سین گؤزلرین گؤزلریمه باخاندا.
عاصی روحوم سکسه نیب بدنیمدن چیخاندا،
بیر طوفان قوپاجاقدیر، بیر ایلدیریم شاخاجاق،
منه بو ائتدیکلرین سنه چوخا باخاجاق.
***
نه مدتدیر اورگیم الینده زیندان چکیر،
زلی کیمی بو سئوگی داماریمدان قان چکیر،
دئمیرسن کی بو یازیق نئچه ایلدیر جان چکیر،
سانیرسانمی دؤشونه بیری مئدال تاخاجاق!؟
منه بو ائتدیکلرین سنه چوخا باخاجاق.
لاختا لاختا قان آخیر بولاغیندان، سویوندان،
یارالیدیر بو تورپاق، قایغیسین چکن ایستر.
آماندیر قوچ ایگیدلر قورویالیم وطنی،
گون گلر اؤولادیمیز بیزلردن وطن ایستر.